DAKPAN sa otoridad ang usa ka inmate sa Baluntay Provincial Jail sa Sarangani atol sa gihimong Oplan Galugad. Giila ang dinakpan sa taho gikan sa Alabel Municipal Police Station nga si alyas Tata, 40-anyos, taga Kiblat, Malungon sa Sarangani.
Matud ni Police Major Wesley Matillano, hepe sa presinto sa lugar nakadawat sila ug ang Philippine Drug Enforcement Agency (PDEA)12 og impormasyon kalabut sa gikaengong presensiya sa gidiling droga.
Ang Oplan Galugad ang miresulta sa pagka-kumpiska sa usa ka puto sa gituohang shabu nga nagkantidad og P2, 000 ug duha ka cellphone. Bag-o paman ang operasyon si alyas Tata ang una nang nagpositibo sa paggamit og gidiling droga sa gipahigayong drug test sa presohan.
Dugang kaso ang atubangon karon sa inmate samtang ang nakumpiskang iligal nga kontrabando ang naa sa Pdea-12. ( Richel Gubalani)