LEZO, AKLAN—Kulong sa Lezo MPS ru sangka laborer matapos nanutok it baril sa Brgy. Agcawilan, Lezo, Aklan.
Sa report, nakilaea ru suspek nga si Eric Sapelleno, 20-anyos ag residente it nasambit nga lugar.
Nakabaton it tawag ru Lezo MPS halin sa sangka concern citizen nga nag-imporma sa nasambit nga may unang eaeaki nga nagpanutok it baril sa sangka sari-sari store.
Eagi man nga nag responde ru mga personnel it Lezo MPS sa pag pamuno ni PLT. Jover G. Ponghon, Acting Chief of Police para sa beripikasyon.
Bago umabot sa lugar ru mga kapulisan, nabuoe eon ni PSMS. Dave Dela Peña nga assigned sa Aklan PPO ru Cal.45 ARMSCOR nga may serial number nga 1183698.
Suno kay Dela Peña, daywang eopok it baril ru nabati-an rason nga gin tan-aw na ag nakitang suspek nga armado it baril.
Gin sugo eon it pulis ru suspek nga ibutang ru baril ag eagi nga tumakas sa lugar.
Naaresto ru tumakas nga suspek pinaagi sa hot pursuit operation it mga kapulisan.
Samtang, maga pangatbang it kasong pag-eabag sa Republic Act 10591 o Comprehensive Firearms and Ammunition Regulation Act ru suspek.//MARIVIC Y. ILIN