LEGAZPI CITY – Nadakop kan mga otoridad sa banwaan kan Polangui an 48 anyos na lalaking nanghabon nin motorskilo.
Binisto ining si alyas “Boknoy”, residente kan Zone 4, Brgy. Sta. Lucia, banwaan nin Nabua, Camarines Sur.
Sa report, nakaparada an motorsiklo na may plate number na 779 EOV na pagsadiri ni alyas “Joel” sa compound kan ALECO.
Pagluwas kaini, duman na niya nadiskubreng nawawara an saiyang lunadan.
Pighanap man niya ini alagad dae nahiling sa lugar kaya inireport na ninda ini sa PNP.
Tulos man nakipagtabangan an pulisya, asin hinanap ninda ini sa tinampo hasta sa mahiling ninda ini sa parte kan Maharlika Highway, Brgy. Agos kan Polangui na pigmamanehar kan suspek pasiring sa Bato, Camarines Sur.
Pinapundo kan pulisya an suspek sa pagmamaneho alagad duminulag ini hasta sa bukudon kan mga otoridad.
Makalihis an pirang minutos, nag-slide sa tinampo an suspek asin nagsapar nin lugad sa lawas.
Tulos man ining inarestar asin dinara sa hepatura kan pulisya para sa magkakanigong disposisyon.