Yara na sa advance state of decomposition sang nasapwan nga lawas sang isa ka lalaki sa kilid sang suba sa Sitio Lanipga, Barangay Sinamongan, Pilar, Capiz.
Ginkilala ang biktima kay Roger Evangelista, 48-anyos, kasado kag residente man sang nasambit nga lugar.
Base sa imbistigasyon sang Pilar PNP, ginapahayag nga samtang nagalakat sa gilid sang suba si Rey Dema, takna alas 1:45 sang kaaganhon kaupod ang duha sini ka kabataan hinali lang nadiparahan nila ang bangkay sang biktima nga wala na sang kabuhi sa gilid sang suba.
Bangud sini, gilayon nga nagpangayo sang tabang si Dema sa barangay kag pinaagi sa himata sang biktima ila ginkumpirmar nga lawas ato ni Evangelista.
Mahibaluan, nga Hulyo 26, 2023 una na nga ginreport ni Marivic Evangelista, 41-anyos kag asawa sang biktima nga nadula ang iya mister sadtong Hulyo 23 pa kag ginapahayag nga may deperensya sa paminsaron.
Sa karon yara na sa isa ka punerarya ang bangkay kag natalana nga ipaidalum sa post mortem examination.//KMD Gicalde