LEGAZPI CITY – Kapot na kan mga otoridad an lalaking pigkokonsiderar na Provincial most wanted person kan Albay huli sa kasong may kinaraman sa pang-aabuso sa syudad kan Legazpi.
An akusado iyo an 27 anyos na lalaki, warang agom asin residente kan kaparehong syudad.
Segun sa report, inarestar kasuudma an akusado kan pinagsarong efuerso kan Legazpi CPS asin iba pang mga unit sa kusog kan mandahamiento de aresto sa kasong pagbalgar sa Section 5-B, Article III kan Republic Act No. 7610 na may piyansa nin maabot sa PHP200,000 sa irarom kan Criminal Case No. FC-23-4442.
Apwera man kaini, igwa man ki PHP10,000 na piyansa an pigrekomendar para sa Criminal Case FC-23-4443 sa kaparehong kaso.
An naarestar na akusado, presenteng nasa kustodiya kan nasambitan na hepatura para sa magkakanigong disposisyon.