Arestado ang mag live-in partner matapos ang ginkasahan sang drug buy bust operation sang gintingub nga puwersa sang Capiz Police Provincial Drug enforcement Unit (PPDEU), Station Drug Enforcement Team (SDET) sang Tapaz kag Jamindan MPS, sa Barangay San Julian, Tapaz, Capiz.
Ginkilala ang mga nadakpan nga sanday Marjorie Palomar, 35 anyos, drug surenderee kag Romel Gallaza, 39 anyos, driver kag lunsay mga residente sang nasambit nga barangay.
Narekober sa posisyon kag paghinakop sang mga suspetsado ang 7 tanan ka sachets sang ginasuspetsahan shabu nga nagabug-at sang 2 gramos kag ginabantan nagabalor sang P13,600, P500 nga buy bust money, cellphone kag drug paraphernalia.
Magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002 sanday Palomar kag Gallaza. Sa karon, nagapabilin ang mga ini sa Tapaz PNP para sa nagakaigo nga disposisyon. | Judy Ann Juare