Gipasidan-an sa labaw sa Cagayan de Oro City Police Office ang mga police precinct commanders sa pagsiguro sa maintenance ug pag-maximize sa paggamit sa mga bag-ong police patrol cars ug roving motorcycles.
Sumala ni COCPO City Police Director Police Colonel Aaron Mandia nga aduna na’y pundo nga nakagahin ang COCPO alang sa pang-tubil sa mga bag-ong sakyanan, gawas pa sa tabang nga ihatag ang kagamhanang lokal sa syudad.
Subay niini, gamiton lamang ang mga nahisgutang dugang kahimanan sa paghatag sa batakang serbisyo sa aspeto sa pamulis.
Una nang nagpasalamat si Colonel Mandia sa suporta ni City Mayor Rolando Uy lakip sa Konseho sa syudad tungod nakita sa kagamhanang lokal ang kakulangon sa gamit sa kapolisan.
Kahibaloan nga emosyonal kagahapong adlawa si City Mayor Uy atol sa blessing ug pag-turn over sa mga bag-ong sakyanan dungan sa pagdumdum niini sa mapait nga kasinatian sa iyang pamilya, kung asa mao kini ang nakapadasig kanila sa paghatag dugang suporta sa kapolisan aron mapakusgan ang pakigbatok sa kriminalidad.
Samtang, gibutyag ni Committee on Police, Fire and Public Safety Chairman Councilor Romeo Calizo nga duna pa’y lauman nga pagtubag sa “security needs” sa syudad.
Ang napulo ka patrol car gi-distribute sa 10 ka police stations, samtang ang walo ka motorcycles gamiton alang sa traffic management, lakip sa VIP management, protection ug uban pa diin dumalaon kini sa COCPO headquarters. -END-