Pilason ang isa ka mamumugon matapos ginlabo sang iya kainuman sa Brgy. Lonoy, Roxas City.
Ginkilala ang biktima kay Renato Bandellon Jr., 52-anyos samtang ang suspek amo si Antonio Abarra, 73-anyos lunsay mga residente sang nasambit nga barangay.
Sandig sa Roxas Component City Police Station, nagpanawag sa ila istasyon si Emma Apilit, security guard sang Roxas Memorial Provincial Hospital agud i-report nga may yara sang biktima sang pagpanglabo nga gindala sa nasambit nga ospital.
Gilayon man nga ginpadulungan sang kapulisan kag naguwa sa imbestigasyon nga samtang nagainom-inom sang makahulubog nga ilimnon ang biktima kag suspek, hinali lang may nagpatunga nga indi pag-intindihanay sa duha kun sa diin nagkuha sang matalom nga hinganiban si Abarra kag ginlabo si Bandellon rason nga napilasan ini sa nawala nga nawong.
Sa karon, nagapabilin sa hospital ang biktima para sa nagakaigo nga pagbulong samtang ginahulat ang desisyon sang iya himata kun magapasaka sang kaso batuk sa suspek. | Judy Ann Juare