Patay ang usa ka menor de edad nga babaye ug laing 10 ang naangol human nalimbuwad ang V-hire sa Barangay Palanas, Lungsod sa Alcantara, Probinsya sa Sugbo.
Ang namatay nga biktima, mao ang 14 anyos nga dalagita.
Nasayran nga ang nakalas nga dalagita giingong naglingkod sa luyo sa driver’s seat ug nalabay kini lusot sa bintana sa sakyanan.
Tungod sa kakusog sa impact, nabunal ang ulo sa sementadong karsada ug gideklar nga patay na pag-abot sa tambalanan.
Gawas sa menor nga namatay, naangol sila si Joseph Codella Maneja 55 anyos, Arnelyn Montemar Maneja 26-anyos, Nelgin Rublica Montemor 19- anyos, Maria Eva Maneja Caballes 31 anyos, Andresa Reponte Maneja 53- anyos, ug Donald Reponte Maneja, 28-anyos, ang drayber sa van.
Lakip usab sa naangol ang tulo ka mga bata nga nag-edad ug 1, 2 ug 7 anyos.
Samtang, grabe si Niño Lorenz Ypanto, 20, ulitawo taga Palanas, Alcantara, human siya nabanggaan samtang nagsakay sa iyang motorsiklo.
Sa inisyal nga imbestigasyon sa Alcantara Police Station giingong 26 ka tawo ang sakay sa usa ka van diin nagbiyahe kini gikan sa Cebu City paingon unta sa lungsod sa Moalboal aron mag-outing.
Giingong pag-abot sa lugar diin nahitabo ang aksidente, nawad-an og kontrol ang drayber sa sakyanan dihang nilikay kini sa traysikad hinungdan nga nilahos kini ngadto sa pikas lane ug nibangga ngadto sa usa ka motorsiklo ug nalimbuwad.///