Padayong gipasidan-an sa Department of Agriculture-7 ang mga local government units (LGU) sa Rehiyon 7 may kalambigitan sa pagpangandam kung ugaling makasud sa rehiyon ang gikabalak-an nga African Swine Fever (ASF).
Nasayran nga nagkaduol na ang maong sakit sa baboy sa rehiyon sanglit nakasud naman kini sa mga dapit sa Eastern Visayas.
Gibutyag ni Gregolito Bunado, program coordinating officer sa DA-7 nga gimanduan na niya ang mga municipal agriculturists sa pag-identify unya sa graveyard o lubnganan sa mga baboy nga posibleng infected sa ASF virus sulod sa 500 meter radius aron malikayan nga mokatap pa ang virus.
Dugang ni Bunado nga gikinahanglan palig-unon ang pagbantay kung diin, moabot pa sa tulo hangtud sa lima ka tuig una maka-recover gikan sa ASF infection.
Tungod niini, gikinahanglang magtinabangay ang nagkadaiyang dapit aron magpabiling ASF free ang Central Visayas.
Lakip sa lakang nga himuon sa DA-7 aron mabatukan ang ASF mao ang pag-andam sa disinfectant ug ubang pang equipments alang sa disposal, ug pagpahigayon ug halapad nga information ug education campaign.
Plano usab nilang mohimo ug weekly monitoring sa mga grocery stores ug mga meat outlets aron masayran kung wala bay gibaligya nga processed meat gikan sa infected area.