Gin-alerto it National Grid Corporation of the Philippines (NGCP) ro publiko sa posibleng pagpatuman it manual load dropping (MLD) sa Panay island.
Raya hay matapos ipasayud it Palm Concepcion Power Corporation (PCPC) sa Concepcion, Iloilo sa NGCP ro pagbawas it kuryente halin sa 124 megawatts to 65 megawatts bangud sa mga isyu sa sueod it planta.
Ginhambaean man ro NGCP nga ro internal issue hay posibleng maging rasun it eubusan nga pag-shutdown it PCPC.
Ro PCPC hay sambilog sa daywa ka maeagko nga power generator sa Panay; ro sambilog hay ro Panay Energy Development Corporation (PEDC), pero daywa eamang sa tatlong unit kara ro naga-gana. // ANN DESLENE SALAZAR