Gihangyo karon sa Department of Social Welfare and Development kon DSWD-XI ang mga myembro sa Pantawid Pamilyang Pilipino Program kon 4Ps nga maghulat una sa text alang sa schedule sa ilang pagpabakuna.
Kini human gibutyag ni 4Ps Regional Program Coordinator sa DSWD XI nga si Margie Cabido nag gisugdan na sa Davao City ang pagbakuna sa mga 4P’s member nga nalakip usab sa A5 Priority Group kon Indigent Population.
Aduna na matud pay vaccination sites nga mo-akomodar sa 4Ps sama sa Magallanes Elementary School, SM City Davao, Buhangin Central Elementary School, Matina Aplaya Elementary School, F. Dizon Elementary School, Davao City National High School, Malagos Central Elementary School, A. Mabini Elementary School, ug ang KorPhil Vocational Training Center.
Samtang ang Calinan Central Elementary School usab, nangandam na aron mo-cater ug mga myembro sa A5 Priority Group sa musunod nga bulan.
Gitataw ni Cabido nga dali ra tumbukon ang mga sakop sa 4P’s aron maapil sa vaccination program tungod accessible ang ilang mga datos.
