Patay ang usa ka inahan samtang samaran ang amahan ug anak human sila mabiktima sa hit & run sa national highway, Barangay del Pilar, Mabini, Davao de Oro kagabii.
Sa report sa Mabini Municipal Police Station giila ang namatay nga inahan nga si Gemman Sobriano, 27-anyos samtang samaran ang live-in partner niini nga si Arjie Masillones, 31-anyos ug anak nga si Jemmar, 1 ka tuig.
Sumala pa nga miliko na unta pawala ang gisakyang motorsiklo sa mga biktima sa dihang napunggit sa naghaguros nga pick-up truck resulta nga nahagba sila sa dalan og nakahiagum og mga samad sa kalawasan.
Nadala pa sa balay tambalanan ang mga biktima apan pipila kahigayon namatay gihapon ang asawa samtang ang suspetsadong driver yano lamang mibiya human sa aksidente.
Nasayran sa imbestigasyon nga padulong sa direksiyon sa Tagum City, Davao del Norte ang pick-up nga gitoohan karon nga usa ka Ford Raptor kolor puti.
Padayon ang imbestigayon sa kapolisan aron ilhong ang suspetsadong driver. BNFM-Davao