Nasikop sa hini-usang pwersa sa NBI SEMRO, NBI TAGDO, CIDG DCFU ug Talomo Police Station ang usa ka negosyante human gireklamo kini nga iligal nga nagnegosyo ug LPG cylinder ug canister ug uban pang mga produktong petrolyo nga walay pagtugot sa gobyerno dinha sa Catalunan Grande ning siyudad sa Davao kagahapon sa buntag.
Subay sa gipagawas nga accomplishment report sa NBI Regional Office XI, giila ang dinakpan nga si Remy Divinagracia Gabrido, residente sa Blk 1, Lot 15, Santo Niño Urban, Sitio Guadalupe, Catalunan Grande.
Pasado alas sais sa buntag gikasa sa mga awtoridad ang operasyon didto sa pinuy-anan sa suspetsado, diin pipila ka mga ebidensya ang nakuha susama sa 34 ka mga butane canister, 1 ka walay sulod mga Phoeinx Tank, 1 ka refilling gudget, 1 ka 500 peso bill nga adunay serial number JF292884 nga gihimong marked money, ug 1 ka sling bag color brown.
Sa dihang nadakpan na si Gabrido, nagpaila pa kuno kini nga usa ka NBI Agent hinungdan gisusi kini nga niresulta sa laing pagka diskobre ug pagka kompiska sa 1 ka Caliber 5.56 M16 rifle nga adunay serial no PR 117570, 67 ka mga bala sa 5.56 M16 rifle, 1 ka fragmentation grenade, 1 ka Smith and Wesson 357 revolver, 4 ka mga bala sa .38 revolver, 2 ka mga short M16 rifle magazine, 1 ka long M16 rifle magazine, 1 unit Nissan Navarra color orange, adunay temporary plate no F2K 928 ug 1 ka NBI ID nga adunay pangalan ni Gabrido.
Sa pakighinabi sa 91.5 Brigada News FM Davao kang NBI – XI Spokesperson Elie Llaño, peke ang NBI ID nga nakuha gikan kang Gabrido ug dili usab tinuod nga confidential gent kini sa NBI Tagum. Gawas sa iligal nga pagpamaligya ug mga petroleum products, gikataho usab kuno kini si Gabrido nga nalambigit sa gun running activity sa Davao del Norte.
Nasayran usab nga gikasa sa mga awtoridad ang maong operasyon batok kang Gabrido human sa reklamo sa sumala pa usa ka taas nga opisyal sa gobyerno labot sa pagpamaligya ug mga LPG cylinder ug canister ug uban pang mga produktong petrolyo sa maong suspetsado.
Gikustodiya na sa CIDG DCFU si Gabrido ug gipasaka na usab ang mga kasong Illegal possession of Firearms and explosives, usurpation of authority, ingon man iligal nga pagpamaligya ug LPG cylinder ug canister ug uban pang mga produktong petrolyo batok sa maong supetsado.
