DAKO ang pasalamat sa usa ka Job order worker sa LGU Gensan nga nakadawat na sila og sweldo adlaw nga Miyerkulis samtang nakadawat usab ang pipila ka regular workers sa ilang P6,000 pesos nga clothing allowance samtang ang uban on process pa ug naulahi.
Sa pahayag ni Larry dugay na nga job order worker sumala niini nga nadawat na nila ang ilang sweldo alang sa bulan sa Desyembre 2021 samtang ang prayuridad mao ang pagpalit og bugas ug ubang kinahanglanon sa panimalay.
Gidugang ni Larry nga sa uban nilang kaubanan nga nagarenta og balay ang mas kaluoy gumikan gisigihan na og singil sa tag-iya sa mga boarding house nga ilang gipuy-an unya nalangay ang sweldo.
Tungod niiini nagapasalamat si Larry sa Brigada Gensan nga gihatagan ug duot ang mao nga isyu gumikan daghan sila nga apektado dili lang motingog ang uban gi-agi na lang sa social media.
Sa ubang nakadawat na og sweldo dili usab tanan tibuok bulan ang nadawat, adunay nakadawat lang og tulo ka libo alang sa usa ka kinsena sa bulan sa Desyembre tuig 2021.
Samtang sumala usab kay Rolan usa ka Regular nga empleyado nga ang una nilang nadawat mao ang clothing allowance nga mokabat sa P6,000 pesos apan naulahi ang ilang sweldo.
Nagapasalamat usab kini kay nahimo nila nga venue ang Brigada sa pagpagawas sa ilang gibati nga kalisdanan sa kalangay sa ilang ginasaligan nga sweldo matag bulan.
Gikumpirma usab sa taga City Treasurers Office nga clothing allowance ang mauna sa ubang empleyado ug maulahi pa ang sweldo gumikan usab sa kalangay sa pagsulod sa mga payrolls bisan sila nag-overtime sa milabay nga adlaw nga Sabado.
Kahibaluan nga nalangay ang sweldo sa mga empleyado sa LGU Gensan gumikan sa kawalay mopirma nga treasurer human nagretiro na si Rodilon Lacap ug walay dayon nahulip sa iyang na biyaan nga posisyon. I Ver Diazon