Nagapin-ot naman ang dughan sang mga driver sa pampasahero nga salakyan kag mga motorista matapos liwat nga nagsaka ang presyo sang gatong sa pungsod.
Ini na ang ika-siyam nga sunud-sunod nga price hike sa gasolina kag ikapulo naman sa diesel kag kerosene.
Sa interview sang Brigada News FM Roxas City kay alyas “Dodoy” isa ka tricycle driver, iya ginpahayag nga wala man sila sang mahimo bangud wala gid naganubo ang presyo sang gasolina.
Dugang pa sini, nagaboundary lamang ini sang tricycle kag ang iya kita sakto lang ibakal sang sud-an agud may ipakaon siya sa iya nga pamilya.
Nahibaluan nga ang presyo sang diesel ang nagsaka sang P0.40 kada litro; P0.20 naman ang nagsaka sa kada litro sang gasolina kag kerosene.
Suno sa Oil Industry Management Bureau sang Department of Energy, ang price hike subong nga semana ang bangud sa kabalaka sang posible supply shortage sa peak winter demands kadungan sang pagpalawig pa sang voluntary supply cuts sang Saudi Arabia kag Russia tubtob sa katapusan sang tuig. | Judy Ann Juare