Wala nagnubo ang presyo sang regular kag well-milled rice sa bahin sang Brgy. Banica, Roxas City bangud ang mga rice retailers diri ang wala nakahibalo nga kinahanglan na magsunod sa executive order no. 39 nga ginpapanaog ni President kag Agriculture Secretary Ferdinand Marcos Jr.
Sa interview sang Brigada News FM Roxas City kay Joselyn Perez, consumer kag retailer, iya ginpahayag nga wala gid sila nakahibalo sa ginapatuman nga price ceiling sang bugas bangud wala man sang may nagpahibalo sa ila sa amo nga pagsulundan.
Dugang pa ni Perez, indi siya miyembro sang mga retailers sa syudad sang Roxas.
Gani, nakibot nalang ini nga may ginapatuman na nga price cap kag wala ini nakahibalo nga kun magsunod siya sa price ceiling madala man siya sa ayuda nga igahatag sang gobyerno.
Dugang pa sini nga yara pa sa 45 ka sako ang iya nga stocks sang bugas gani kun iya ini nga ibaligya sa barato nga presyo indi gid ini makabawi sa iya nga capital.
Mahibaluan, sang nagligad nga Setyembre 6 nagsugod na sa pagsunod sa price ceiling ang mga retailers sa bahin sang Teodoro Arcenas Trade Center (TATC) bangud nagkalasugot na ang mga miyembro sang Roxas City Grains Retailers Association.
Sa karon, padayon sa gihapon ang monitoring sang DTI sa mga merkado agud mapahibalo ang mga manugbaligya sang bugas kag makuha ang listahan sang mga retailers para mahatagan sang nagakaigo nga ayuda. | Judy Ann Juare