Sa ginpatigayun nga Inter-Agency Monday Flag Raising Ceremony sa Willy’s Rock sa isla it Boracay kaina it agahun, gin-insister ni Malay Mayor Frolibar S. Bautista nga samtang nagahilapit eon sa katung-anan it dag-on, kinhangean nga ipabilin ro kalimpyo, kaayusan, ag katawhayan sa isla agud masiguro ro padayun nga pagbangon it ekonomiya kara.
Gin-engganyo man it alkalde ro tanan nga padayun nga magbueoligan para sa ikamayad it isla it Boracay.
Dugang pa kara, ginsambit man ni Mayor Bautista nga bangud ro June 5 hay World Environment Day, gin-engganyo nana ro tanan nga ipakita sa kalibutan nga ro Boracay hay sangka environmental destination.
Gin-insister pa nana nga kinhangean nga magbueoligan agud mapabilin ro reputasyon it isla bilang pinakamasadya nga isla sa kalibutan.
Samtang, nagpanupod man ro LGU Malay it certificate of appreciation sa mga nag ubra it andang trabaho ag nagpakita it mga tikang sa pagpahaum sa nagtaliwan nga Super Typhoon Betty sa banwa it Malay. // ANN DESLENE SALAZAR