Ginkuritan ang sidewalk sa Teodoro Arcenas Trade Center agud malimitahan ang mga vendors sa pagbutang sang ila mga baligya.
Sa interview sang Brigada News FM Roxas City kay Heloise Mendoza, Market Administrator sang TATC, iya ginpahayag nga ang mga sidewalk vendors ang na-displaced bangud re-development sang merkado.
Gin-athag man sini nga ila-ginpahanugutan ang mga vendors nga magbaligya sa sidewalk agud mapadayon sa gihapon ang ila palangitan-an bangud ang ila stalls sa sulod sang merkado ang ginpangguba kag wala pa nabalik.
Suno kay Mendoza, bangud sa mga ginapatuman nga ordinansa sa syudad nga anti littering, anti smoking kag anti dumping, nahuya siya nga magpangdakop sa mga vendors gani ila nadesisyonan nga kuritan nalang ang sidewalk agud may yara sang limit ang mga vendors nga magbutang sang ila mga baligya.
Ginpahayag sang natungdan nga iya man gin-eksplekar sa pamunuan sang CORE Unit ang rason sa pagdagsa sang mga vendors kilid sang merkado.
Nagapangayo man ini sang pasensya sa mga vendors nga naapektuhan kag iya ginapangabay nga magsunod lang ang tanan sa mga ginapatuman nga ordinansa kay ini ang para gid sa kaayohan sang tanan. | Judy Ann Juare