NAGPASIBAW sa ilang pagsupak sa ipatukod nga tower ang mga taga purok 10, Barangay Lagao unya nagareklamo sila kay nagsugod na ang trabaho sa mga panday ug mga ekipo sa pagbangag sa yuta taliwala sa daghang mga panimalay sa palibot.
Desyembre 2 niadto sa estasyon sa Brigada ang duha ka lomolupyo sa Purok 10, Lagao dala ang ilang sulat nga gipa-receive sa Barangay Lagao, permado sa 34 ka mga individual pinitsahan, Nobeymbre 23, 2021.
Mabasa sa ilang petition form to stop the construction of tower nga kinahanglan nila og hinanali nga aksyon batok sa cell site tower nga itukod sa Purok 10, Barrio 1, Lagao sa sulod sa Managuit Compound, ang tower nga ipatukod nahimutang sa residential area.
Nagatuo kami nga kini nga proyekto may risgo sa panglawas ug sa mga kabataan, sila nagahangyo nga mapaundang gilayon ang proyekto alang sa safety sa ilang pamilya kay dili industrial ang area.
Gidugang sa ilang sulat nga nasayod usab sila nga adunay circular gikan sa Pangulo ug nakasabot sila nga ang mga proyekto sa tower ipatukod bisan walay pagtugot sa mga lumulopyo ug sa barangay.
Sumala kay Rolando Militante nga ang balay anaa gayod sa atbang sa ipatindog nga tower nga siguro may saktong lugar alang sa mao nga proyekto ug dili sa taliwala sa mga panimalay.
Samtang sa pagpanubay sa Brigada sa Barangay Lagao gikumperma sa chairperson sa komitiba sa Land and State nga si Kagawad Ceylen Blando Cobreros pinaagi sa chat nga nakahimo na sila og consultation sa mao nga isyu tinambungan sa mga residente sa lugar lakip na ang taga City Planning Office ug na-indorso na sa City hall ang resulta sa consultation, samtang nakatambong usab sa consultation ang laing duha pa ka konsehal.
Gikumeprma usab ni Kagawad Jan Michael Tanzo nga nakaapil siya sa consultation ug nadungog ang sentimyento sa taga Purok 10, Lagao ug alang kaniya angay lang nga paminawon ang mga naga reklamo nga nakuratan sa mao nga proyekto.
Wala pa usab dayon nakahatag tubag ang labaw sa City Planning Office gumikan sa rason nga on leave pa. ( Ver Diazon)
Photo for Illustration Purpose only