NAGPAGAWAS na og progress report ang Fatima Police Station kalabot sa pagpamusil sa magtiayong negosyante sa Purok Lumbang, Barangay San Jose nga gikamatay sa asawa samtang buhi ang bana.
Alas 6 sa gabei gitala ang progress report nga resulta sa imbestigasyon sa Fatima Police Station sa pagpanguna sa ilang hepe.
Subay sa re-entry sa unang blotter nailhan na sa kapulisan ang duha ka gikonsiderang suspetsado sa pagpamusil sa magtiayong Apolinario Matela ug Teresita Matela kaadlawon sa Desyembre 2 sa ilang balay ug tindahan sa Purok Lumbang, San Jose.
Tungod niini gina-andam na ang kasong murder ug frustrated murder batok sa mga suspetsado.
Kahibaluan nga sa unang testigo nga nahinabi sa media nga si Michael Liwas sumala niini nga nakita niya ang tanang hitabo apan wala niya nadungog ang gi-estoryahan ni Teresita Matela ug sa gunman,wala usab daw niya naklaro ang nawong kay naka-bonnet.
Samtang sa impormasyon gikan kay Kapitan Abdulrahim Paidumama sumala niini nga nakaabot na sa iyaha ang impormasyon nga aduna nay pangalan ang mga suspetsado apan ang usa lang ang iyang nailhan samtang dili daw familiar ang apelyido ngasa usa sa Purok Shuttle nga anaa sa unahan sa Purok Lumbang.
Gidugang ni Kapitan Paidumama nga kaila niya ang magtiayong negosyante ug matag tuig naga kuha og clearance sa barangay alang sa ilang negosyo ug maayo daw nga mga tawo ang magtiayon gani anga pautang pa sa mga trabahante sa Dole nga anaay area sa ibabaw nga bahin sa barangay.
Nagapanghinaut si Paidumama nga masulbad dayon ang kremin kay sa iyang pangagpas pagpanulis ang motibo sa kremin, samtang
naghatag pagpaklaro ang usa ka inahan nga nagpuyo sa Purok Sto Niño, Barangay San Jose kalabot sa paglutaw sa pangalan sa iyang anak sa duha ka gitudlong suspetsado sa usa ka kremin sa Purok Lumbang kaadlawon sa Desyembre 2, 2021.
Desyembre 3 sa udto niadto sa Brigada ang duha ka babaye ang usa nagpaila nga inahan sa gitudlong suspetsado samtang ang usa nagpailang igsuon.
Sumala kay Imelda Centes nga dili siya makatuo nga malambigit sa unsa man nga kremin ang iyang anak nga nagatungha pa sa ALS ug anaa lang sa ilang balay nagapondo.
Gidugang ni Imelda nga kon naapil man sa pagdala sa Tambler PNP miaging Nobyembre 29 ang iyang anak gumikan napasanginlan nga apil sa sugal apan nabuhian daw kini pagka-ugma.
Gumikan niini ang unsa mang nigawas sa balita o impormasyon gikan sa presento sa kapulisan o sa media ginabaliwala kini sa inahan. ( Ver Diazon)