Arestado ang isa ka top 3 most wanted person sa banwa sang Sapian matapos ginserbehan sang warrant of arrest sa Barangay Poblacion Norte, Ivisan, Capiz.
Ginkilala ang nadakpan kay Julius Occeño Singson alyas “Pango” 32 anyos, mangunguma kag residente sang Barangay Malocloc Sur, sa nasambit nga banwa.
Nagapangatubang sang kaso nga Robbery with Violence Against or Intimidation of Person si Singson, kun sa diin ang warrant of arrest ang ginpirmahan kag gin-isyu ni Hon. Judith D. Orendain-Tonogbanua, presiding judge, Regional Trial Court (RTC) 6, Branch 20, Mambusao, Capiz, napetsahan Mayo 8, 2023.
Ginrekomendar sang Korte ang P100,000 nga piyansa para sa temporaryo nga kahilwayan sang akusado.
Sa karon, nakahunong ini sa karsel sang Ivisan MPS para sa nagakaigo nga disposisyon. | Judy Ann Juare