ANGOL ang usa ka Imam human nga gitabangan ug kulata sa mga tricycle driver sa J. Catolico Avenue alas kwatro sa hapon September 16, 2023 gumikan sa Road rage.
Sumala sa biktima nga si Ameruden Linog, 62-anyos,minyo ug taga Purok 5 Barangay Domolok, Alabel, Sarangani Province nga niadto siya sa Gensan kuyog ang iyang asawa kay nag asikaso sa uniform sa ilang mga estudyante.
Gikan daw siya sa palengke paingon sa J Catolico Avenue sa dihang adunay laing tricycle nga niliko paingon sa dalang Magaysay unya nasangit sa bakal sa iyang tricycle unya nagasgas ang pintura.
Una sila nga nag atubangay sa daplin sa dalang Santiago Boulevard apan isog daw ang driver mao nga nidiritso nalang siya sa iyang padagan, apan gi atangan siya pag abot sa atbang sa usa ka mall unya gitabangan og kulata.
Nasamad ang iyang ulo ug duha ka braso unya gitabangan sa duha ka babaye nga nakasaksi sa hitabo,nadala siya sa tambalanan unya nakagawas pagka gabii sa adlaw nga Sabado. I Ver Diazon