GIKLARO ni Davao City Mayor Sara Duterte-Carpio nga dili requirement sa pagsulod sa Roxas Night Market ang vacciantion status sa usa ka indibdiwal.
Sumala sa Mayor, walay restrictions mahitungod sa pagbakuna ang ipatuman ngadto sa mga tawo sanglit taas ang vacciantion rate ug gamay lang ang wala pa nabakunahan.
Dugang pahayag sa opisyal nga “open space” ang Roxas Night Market apan hugot gihapon niining giawhag ang mga residente nga mosulod sa perimeter nga magsoot og face mask.
Anaa pa karon sa preparation stage ang Roxas Night Market team partikular na sa himoon nga pag-raffle sa slots sa mga vendors nga mamahimong maka-negosyo, lakip usab ang gilusad nga mga orientation ug markings.
Una niini gibutyag ni Dr. Michelle Schlosser, tigpamaba sa COVID-19 Task Force nga giplanohan sa health sector ang pag-require sa vaccination status sa mga musulod sa Roxas Market.
Kahibaluang sa Marso 24 gilaumang mobalik na ang operasyon sa night market diin gatusan ka gagmayng negosyante ang makabalik na sab sa pagpanginabuhi human sa duha ka tuig nga pagsirado niini.