CEBU CITY- Giingong lakip sa nihatag ug courtesy resignation sa trabaho ang hepe sa Cebu Police Provincial Office (CPPO) kauban ang 18 ka mga third level officers tungod sa giingong kalambigitan sa kalihukan sa illegal drugs.
Una niini, gidawat ni Presidente Ferdinand Marcos Jr. ang resignation sa mga pulis human sa rekomendasyon sa National Police Commission (Napolcom).
Si Police Colonel Rommel Javier Ochave, kinsa niasumer sa iyang katungdanan isip CPPO chief niadtong Septyembre 2022 ang usa sa mga pulis nga nipasa ug resignation sa Presidente.
Gawas kang Ochave, laing Sugbuanong pulis usab ang nihatag ug resignation mao si Police Brig. General Pablo Gacayan Labra II ug si Brig. General Remus Balingasa Medina.
Nasayran nga si Labra dugay ng nadestino sa Cebu City Police Office (CCPO) ug Police Regional Office (PRO- 7), hangtod sa iyang pagkatudlo isip police attache sa Malaysia, Indonesia, Singapore, Myanmar ug Thailand niadtong 2015.
Samtang si Medina, kinsa nadestino isip hepe sa Regional Intelligence Division (RID 7) sa dihang regional director pa si kanhi PNP Chief Debold Sinas.
Ang ilang courtesy resignation giduso human si Local Government Secretary Benhur Abalos Jr. nanawagan niini niadtong Enero, human nasakmit ang 990 ka kilo sa shabu nga balor og P6.7 billion ang giisip nga labing daghan nga ilegal nga drugas nga nasakmit sa nasod.//