DAKPAN ang menor de edad nga lalaki human na-track ang lokasyon sa usa ka cellphone nga gikawat niini sa balay sa maestra sa GenSan.
Matud ni Police Major Ivan Charles Abastillas, hepe sa Lagao Police Station, alas-2 sa kadlawon dihang gisulod sa menor de edad ang balay.
Base sa kuha sa CCTV, hinay-hinay nga gisulod ni alyas Kent, 16-anyos ang balay samtang nangatulog sa sala ang miyembro sa pamilya.
Gikuha niini ang airpods, P4, 500 case ug duha ka cellphone nga naa sulod sa bag nga nakabutang sa ulohan sa mga nangatulog.
Sa imbestigasyon, migula nga usa pa lang ka bulan sa GenSan ang menor de edad human nakagawas sa Bahay Pag-Asa sa Kidapawan City.
Dugang ni Abastillas, dako og tabang ang application sa selpon sa pagtultul nila sa gikahimutangan sa menor de edad nga nasikop nila.
Sa karon, tua na sa Bahay Pag-Asa GenSan ang nadakpang menor de edad. I Richel Gubalani