Mokabat sa 43 ka mga binuhing baboy ang gipangpatay sa African Swine Fever (ASF) Task Force Butuan gikan sa tulo ka mga barangay sa siyudad human nakatala og kaso sa makamatay’ng sakit sa mananap.
Ang nahisgotang mga baboy gikan sa Baan Riverside, Buhangin, ug Mahay.
Sumala ni Dr. Danilo Mancio Alegado, ang Veterinary Officer sa Butuan City Veterinary Office, protocol sa ahensya nga patyon ang tanang baboy nga nasulod sa 500 meters radius gikan sa lugar nga nakatala og kaso sa ASF sa ingon di kini makakaylap sa sikbit nga mga barangay.
Gikomperma usab sa opisyal nga dunay pundong gigahin ang kagamhanang lokal alang sa pinansyal nga ayuda sa mga apektadong namuhi og baboy.