MAKAGAWAS na sa ilang balay ug makapainit sa adlaw si Nanay Monic, nga dili na makalakaw ug makalingkod tungod sa sakit niining diabetes ug halap na ang mga mata tungod sa wheelchair nga gihatag sa mga miyembro sa KaBrigadahan GenSan ug KaBrigada Foundation.
Asoy sa anak niini nga si Mary Lourdes Lasaca nga human nahulog sa hagdan ug miresulta sa pagka-stroke, dili na makatindog ug makalakaw ang inahan ug magpunay na lang og lingkod sa katre, mao nga kung may wheelchair, mas ilaha kining mapalingkod ug mapagawas gawas ug mainitan sa sidlak sa adlaw.
Tuod man gidungog sa mga miyembro ang hangyo ni Nanay Monic, 88-anyos ug personal gihatod ni Brigada Elmer V.Catulpos ang wheelchair sa balay ni Nanay Monic sa Kadulasan St., Barangay East.
Ang nasampit nga wheelchair naggikan sa pagtinabangay sa mga miyembro sa KaBrigadahan Gensan pinaagi sa kada semana nga pagdonar sa mga nanginahanglan nga mga miyembro.
Ang mga miyembro sa KaBrigadahan Gensan kay gibansagan nga bayani ni Catulpos tungod sa ilang walay puas nga pagtabang sa ilang isigkatawo.