Muling ipinaalam ng pamunuan ng DSWD Field Office 2 ang kanilang Government Internship Program para sa mga kabataang estudyante na nais magkaroon ng trabaho habang nasa bakasyon.
Sa Up-Up Cagayan Valley ng Tactical Operations Group 2, inihayag ni Mylene Ataban ng DSWD Region 2 na upang maging kwalipikado sa nasabing programa ay dapat nasa ika-18 hanggang ika-22 taong gulang ang mga ito.
Made-deploy naman ang mga papasa sa Internship Program sa iba’t ibang ahensiya ng gobyerno katulad na lang sa mga Local Government Unit.
Masusing proseso rin ang pagdadaanan ng mga aplikante lalo pa at susuriing mabuti ng ahensya ang mga kwalipikasyon at prayoridad aniya ang mga indibidwal na nasa laylayan ng lipunan.
Sa mga nais sumubok sa Internship Program ay maaaring magtungo sa mga pinakamalapit na opisina ng ahensiya.
Samantala, muli ring pinaalalahanan ng DSWD ang mga magulang na hinahayaang magtrabaho ang kanilang mga batang anak na huwag na nilang payagan ang mga ito na mamalimos at magtrabaho.
Aniya ipapatawag ng CSWDO ang mga magulang na lalabag sa Child Labor Law at sasailalim sa mga counseling series.