𝗧𝗨𝗟𝗢𝗡𝗚 𝗡𝗚 𝗣𝗨𝗕𝗟𝗜𝗞𝗢 𝗦𝗔 𝗣𝗔𝗚𝗞𝗔𝗞𝗔𝗞𝗜𝗟𝗔𝗡𝗟𝗔𝗡 𝗡𝗚 𝗦𝗨𝗦𝗣𝗘𝗞 𝗦𝗔 𝗣𝗔𝗚𝗡𝗔𝗡𝗔𝗞𝗔𝗪 𝗦𝗔 𝗧𝗔𝗕𝗨𝗞, 𝗛𝗜𝗡𝗜𝗡𝗚𝗜 𝗡𝗚 𝗣𝗡𝗣

Nanawagan ang Tabuk City Police Station ng tulong sa publiko hinggil sa pagkakakilanlan ng suspek sa pagnanakaw sa isang establishimento sa lunsod.

Batay sa post ng PNP Tabuk, agarang magtungo sa kanilang himpilan ang sinumang makapagbibigay ng impormasyon at nakakakilala sa suspek na nasa video.

Una rito, kahapon, August 10, 2023 ay naganap ang pagnanakaw sa GNF General Merchandise sa Purok 4, Bulanao kung saan nakapasok ang kawatan sa pamamagitan ng tubular window grills gamit ang isang hagdan.

Lumalabas sa inisyal na imbestigasyon ng kapulisan na nagawa pang i-disconnect ng suspek ang CCTV.

Kinuha nito ang isang vault na naglalaman ng P600,000 cash at mga alahas na nagkakahalaga ng P200,000.

Ang robbery ang nangunguna sa index crime ng lunsod sa loob ng anim na buwan kung saan ito na ika-sampung kaso.

Sa ngayon ay nagpapatuloy ang isinasagawang imbestigasyon ng PNP hinggil sa naturang insidente.