Padayon gihapon ang panawagan sa nagkadaiyang grupo nga supak sa aerial spraying sa bisan asang bahin sa Davao City.
Una niini , gihinumdom sa grupong Mamamayang Ayaw sa Aerial Spray (MAAS) ug Interfacing Development Interventions for Sustainability (IDIS) ang ika-lima ka tuig nga pagdeklara sa Korte Suprema nga unconstitutional ang Ban Aerial Spraying Ordinance sa syudad niadtong August 2016.
Subay sa pahayag ni Dagohoy P. Magaway, presidente sa MAAS, lima ka tuig na ang milabay apan dili pa gihapon matukib sa kadaghanan kung unsa ang kapasikaran sa Korte nag gideklara kining unconstitutional nga nipabor sa mga industriya inay ang paghatag og importansya sa kinabuhi sa inosenteng sibilyan nga maapektuhan sa fumigation o pagpaulan og kemikal/pestisidyo sa plantasyon sa saging.
Gihingusgan sa grupo nga ang susamang pamaagi sa pagpanguma makadaot sa panglawas sa katawhan ug makapasamot sa polusyon sa hangin ug tubig nga padayong nasinatian karon sa ubang Dabawenyos.
Subay sa monitoring sa grupo, sukad napasa ang ordinansa niadtong 2007 ug gibasura sa Korte Suprema, nagpadayon ang aerial spraying sa mga pesticides sa mga plantasyons sa Brgy. Lacson, Dacudao, Lasang, ug Subasta.
Sa milabayng semana lang usab gibisita sa IDIS ang
Dacudao ug Brgy. Lacson kung diin nasuta nga pabiling suliran sa mag residente ang kawad-on og buffer zones sa ilang gipuy-an gikan sa mga plantasyon.
Tungod niini nanawagan ang MAAS ug IDIS sa Department of Environment and Natural Resources (DENR) nga imonitor kung dunay buffer zones ang mga plantasyon ayha isyuhan sa Environmental Compliance Certificate (ECC).
Samtang gihagit usab ang lokal nga panggamhanan sa Davao nga hingpit nang ipatuman ang Watershed Code nga magdili sa aerial spraying partikular sa environmental critical areas, magmugna og Local Multipartite Monitoring Team (MTT) alang sa mga plantasyon Plantations ug supurtahan ang proposed city ordinance nga magbawal sa aerial spray sa tanang agricultural entities sa syudad. BNFM-DAVAO
