Suportado it Department of Health (DOH-6) ro suhestyun it Aklan Provincial Government nga pahauman ro paga eubngan sa kada banwa kasunod it pagbalibad it Gegato-Abecia Funeral Homes, Inc. and Crematory sa pagbatun it bangkay it namatay bangud sa COVID-19.
Nasayuran nga nag angkon it technical problem ro nasambit nga crematorium rasun nga temporary anay nga ginpundo ro pagbatun it bangkay.
Base sa pamunuan it DOH-6, kung indi ma-cremate ro bangkay, puwede man ro ground burial pero kinhangean nga 25-meter radius ro kaeayuon kara sa mga residential areas ag maeayo sa water table para malikawan ro contamination.
Sa pihak nga parte, ginklaro man it pamunuan it crematorium nga owa sanda nagpundo sa pag-operate pero temporaryo anay sanda nga magapundo sa pagbatun it mga bangkay nga namatay sa virus halin sa guwa it syudad ag probinsya it Iloilo. / ANN DESLENE SALAZAR