NAGPAABOT sa ilang reklamo ang pipila ka driver sa van nga miturno sa Gensan padulong Kiamba, tungod milabay nga bulan sa Nobyembre, adunay mando gikan sa LGU nga ipabalhin sila gikan sa ilang pwesto sa Ablog Terminal, Barangay Dadiangas North, ngadto sa Bulaong terminal, aron dili matud pa magdasok ang mga pasahero nga musakay.
Apan wala kini nahimong patas tungod adunay pipila ka driver nga misunod sa mando sa lokal nga panggamhanan samtang ang ubang driver wala mituman, ug nagpabilin gihapon sa Ablog terminal.
Matud sa usa ka driver nga si alias Roy, usa siya nga misunod sa mando sa LGU nga mobalhin sa bulaong terminal, apan asoy niini nga adunay mga kaubanan niya nga naga pick-up gihapon og pasahero sa Ablog terminal.
Ang uban nagapangilog og pasahero, ug anaa pay pipila nga ginakarga sa tricycle ang mga pasahero gikan sa Ablog ug ginahakot sa Bulaong terminal. Samtang sila nagapaabot lang sa Bulaong kung asa gimando nga didto kinahanglang maghulat ang tanang driver sa Van ug gidili na sa Ablog Terminal.
Nahimo matud pa nga bias alang kanila nga misunod sa balaod, ug usahay mooli nalang sila nga walay pasahero tungod nahurot na og pick-up sa ubang mga driver nga mipabilin sa Ablog. Kapin duha ka bulan na silang nagpaabot sailang reklamo ngadto sa Bulaong terminal administrator nga si Jong Facurib apan ginabalewala lamang sila.
Nanghinaot si Roy nga hatagan og aksyon ang ilang reklamo, ug hugtan ang balaod alang sa mga driver nga dili mokuha og pasahero gikan sa gawas, kundili maghulat sa Bulaong terminal ug didto isakay ang tanang pasahero. ( Enamie Mogpon)