PATAY ang duha ka mga motorista human nadisgrasya kagahapon sa tungang gabii sa managlahing lugar dinhi sa syudad sa Davao.
Una na nga nadisgrasya ang usa ka Alberto Matias, driver ug resident sa Prk. 12 Lower Madapo, Brgy. 8-A, ning syudad.
Alas- 12:30 sa kadlawon kagahapon gisubay sa biktima ang dalang Father Selga padulong Madapo, apan pag abot atbang sa Wireless Cemetery, nawad-an sumala pag kontrol ang driver hinungdan nga natumba kini.
Mirespondi dayon ang Ambulance sa Central 911 sa lugar ug daling gidapatan og medikasyon apan gideklara kining patay na.
Gidala ang patay’ng lawas niini sa Angel Funeral Homes.
Samtang, susamang oras ug adlaw, duna say nadisgrasya sa Davao Coastal Road, diin patay usab ang biktima nga trabahante sa gobyerno.
Naila kining si Rolan Decatoria Acao, 40, trabahante sa local Civil Registry ug taga- Purok 5, Venus Street, Crossing Bayabas, Toril.
Gikan ang biktima sa Matina Dumalag ug padulong kini sa Talomo road,
sa pag-abot sa dapit nga nahitaboan, kalit na lamang kini nga natumba ug naigo ang dagway sa sementadong railing sa tulay.
Gumikan sa impak, pila ka metros nga nasadsad ang motor uban ang driver nga maoy hinungdan nga dead on the spot ang biktima.
Gidala sa Collado Funeral Homes ang patay’ng lawas.