KORONADAL CITY- NAKAKUMPLETO ang National Housing Authority (NHA) Region 12 ng 3,095 na mga housing units para sa mga informal settler families (ISF) at mga indigenous people o IP sa buong Soccsksargen region mula noong 2016 hanggang 2020.
Ayon kay NHA 12 regional manager Engr. Zenaida Cabiles na ito ay may kabuuang halaga na P 262 million at naipatupad sa ilalim ng NHA Resettlement Assistance Program to LGU (RAP-LGU).
Sa ilalim ng RAP-LGU para sa mga ISF, ang lahat na mga munisipyo at 5th to 6th class cities at mga probinsya ay makakatanggap ng grant na hanggang P25 million per project.
Sa RAP LGU sa mga IP’s, nagbibigay ang NHA ng P 20 million na grant sa mga LGU para sa implementation ng housing projects sa mga indigenous cultural communities.
Sa South Cotabato, kabilang sa mga natapos na housing projects ang Banga Resettlement sa Barangay Benitez, Banga na may 100 housing units at ang Kasadya Village sa Barangay Dajay, Surallah na may 100 din na housing units.
Inihayag ni Cabiles na maaaring mag-avail ang mga LGU ng technical at financial assistance para sa housing projects sa sa kanilang lugar sa pamamagitan ng pagsumite ng proposal sa NHA.
