Patay ang siete anyos nga bata samtang angol ang laing tulo ka indibidwal sa nahitabong landslide sa Sitio Kalachuchi, Brgy Salaysay, Marilog District, ning syudad alas-9:00 sa gabii niadtong Enero 18, 2024.
Giila ang mga biktima nga sila Jheron Hamaguchi Manay, kinsa dead on the spot human sa insedente. Samtang nakaangkon og multiple injuries si Ryan Maguana Manay, 35 anyos, laing Anjaneth Hamaguchi Manay, 28 anyos, inahan sa batang namatay ug nakaangkon kini’g samad sa iyang tuo nga paa, ug usa ka Zhyriel Anne Hamaguchi Manay, 9 anyos.
Nasayran nga ang mga biktima anaa sulod sa ilang panimalay sa dihang kalit na lamang nahitabo ang pagdahili sa yuta.
Dali hinoon nga gipangdala sa SPMC ang mga biktima ug gipailalom sa pagtambal samtang ang patay’ng lawas sa siete anyos ang gidala sa Angel funeral Parlor sa Calinan, ning syuda sa Davao.