Nagdangat na sa kapin 100 nga mga motorista nga wala nagasuksok sang helmet kag wala sang lisensya ang nadakpan sa idalom sang “No Helmet, No Driving” Ordinance sa Roxas City.
Ini ang ginpahayag ni Mr. Butch “Butchoy” Andrada, hepe sang Traffic Management Unit sang ma-interview sang Brigada News FM Roxas City.
Suno kay Andrada, magluwas sa wala nagasuksok sang helmet madamo man sila sang nadakpan nga driver nga wala sang lisensya ukon expired na ang mga dokumento.
Ginpahayag man sini nga dapat ang mga backrider ang nakahelmet man sa tion nga magsakay sa motor.
.
Dugang pa ni Andrada, kinahanglan nga makasettle ang mga violators sa sulod sang lima ka adlaw agud mabayaran ang ila penalidad bangud kun sila ang mapaslawan maobligar ang TMU nga igaforward ukon igapasa sa piskal ang nasambit nga kaso para sa nagakaigo nga pagproseso.
Nagapanugyan naman ni Andrada sa mga motorista nga magsunod sa nasambit nga ordinansa agud indi mamultahan kag makumpiskar ang ila motorsiklo.
Nagapanawagan man ini sa mga motorista gikan sa iban nga kabanwahanan kag kalapit nga probinsya nga hibaluon ang mga ordinansa sang syudad.