Matigdas nga ginpahayag ni City Councilor John Paul Arcenas nga wala siya nahadlok kun indi ini pagbotohon sa masunod nga eleksyon sang mga pumulyo nga indi pabor sa iya pagduso sang “No Helmet, No Driving” Ordinance sa palibot kag sentro sang syudad.
Sa interview sang Brigada News FM Roxas City kay Arcenas, iya ginpahayag nga tinutuyo sang nasambit nga ordinansa nga makahatag sang proteksyon kag makasalbar sang kabuhi sang mga motorista.
Dugang pa sini, nalipay siya sa maayo nga resulta sa pagpatuman sang ordinansa bangud iya nakita nga madamo na ang nakahelmet, apang iya man ginkasubo nga madamo sang nadakpan kag nagapakatig-a sa pagsunod sa layi.
Ginpahayag man sini nga 24/7 ang pagpangdakop sang mga otoridad.
Apisar malapit lang ang pagakadtuan sang isa ka indibidwal kag nagasakay sa motor indi ini rason nga indi magsuksok sang helmet bangud kada barangay ang may yara sang CORE Unit nga nagabantay.
Nagalaom man ang natungdan nga tumanon sang mga motorista ang ordinansa agud wala na sang madulaan pa sang kabuhi nga mahimo matuga sang pagkaaksidente sa dalanon. | Judy Ann Juare