IBAAN – Dead on the spot ang isang lalaki matapos na pagbabarilin ng riding in tandem sa national road, Brgy. Sabang, Ibaan, Batangas, bandang 8:00 ng umaga kahapon.
Kinilala ang biktima na si Antonio Mindanao Jr., 36-anyos, kolektor ng isang motorcycle company at residente ng Brgy.Poblacion A, Rosario, Batangas.
Ayon sa imbestigasyon ng Ibaan Municipal Police Station, sakay umano sa kanyang motorsiklo ang biktima nang binaril ito ng dalawang beses ng suspek na angkas sa motorsiklong walang plate number.
Nagtamo ng tama sa kanyang likod ang biktima na naging dahilan ng kanyang agarang kamatayan.
Nagpapatuloy ang ginagawang hot pursuit operation ng mga awtoridad laban sa mga suspek ng naturang pamamaril.
Inaalam na rin ang motibo sa nangyaring pamamaslang.