Bangkay it mga mag-asawang pinatay it uwa pa makilaeang suspek sa Barangay Cabayugan, Malinao, Aklan, eagi nga gin eobong kahapon, Mayo 5.
Suno kay Che Arocha, Batchmate it biktimang babaye, gin eobong kahapon bandang alas 5:00 it hapon kaibahan ru pilang mga myembro’t pamilya ag mga ka Batch-mate sa high school it biktima.
Raya hay matapos ma-autopsy it Scene of the Crime Operative (SOCO) dahil indi eon pweding maibayahe ru bangkay para sa cremation sa syudad it Iloilo.
Dugang pa ni Arocha, gusto it unga ku mga biktima nga sangka nurse nga masayuran ru medico legal report.
Samtang, padayon pa ru follow-up investigation it mga kapulisan natabong krimen.
Kun matandaan, nasapwan eon lang it pilang ka mga residente ru mga mag-asawang George ag Lucila Cabawatan nga uwa eon it kabuhi matapos may 4 nga adlaw nga uwa makita sa lugar.
Nasayuran nga si Mr. George Cabawatan hay sangka retired emplyoee samtang si Mrs. Lucila Iradiel-Cabawatan hay sangka retired English teacher it sangka Australian International School sa Manila. //MARIVIC Y.ILIN