Kumpletong naipatigayun ro Community-Based Monitoring System, katuwang ro Philippine Statistics Authority (PSA) ag LGU Kalibo sa 16 nga barangay sa Kalibo halin it August 8, 2022 to December 30, 2023.
Kapin sa 18,660 households ro na-interview, ag ro mga raya hay may kabilugan nga populasyon nga 72,286 as of July 1, 2022.
Sambilog sa mga data nga nakolekta halin sa CBMS hay ro electricity ag internet access, kung siin, nagaguwa nga sa 18,660 households sa Kalibo, kapin sa 99% o 18,468 kara ro may access sa kuryente ag internet, samtang 1% o 192 households ro owa it access sa elektrisidad okun owa sanda it kuryente.
Ro Brgy. Mobo sa Kalibo ro may maabung household nga owa pa it kuryente sa andang baeay nga umabot sa 24 o 4.7%; sinundan raya it Brgy. Pook nga may 23 household o 1.6% nga owa gihapon it kuryente ag Nalook nga may 9 household o 1.3%.
Pag abot man sa internet access sa Kalibo, kapin sa 70.6% ro may internet access sa andang baeay samtang 29.4% o 5,484 ro owa it internet.
Ro nasambit nga datus hay base sa ginpresenta sa Data Turnover Ceremony 2022 Community-Based Monitoring System (CBMS). // ANN DESLENE SALAZAR