KALIBO, AKLAN — Nagadugang eon makarun ro numero it mga pasahero sa Kalibo International Airport (KIA) kamana man ro flights.
Sa pahayag sa Brigada News FM Kalibo ni Airport Manager Engineer Eusebio Monserate Jr., raya hay bangud man sa paghaeuga it pilang restrictions sa covid-19.
Nagagamit man segun ro pilang airline company it mabahoe nga aircraft ngani maabu man ro andang nasasakay nga pasahero.
Intact man segun ro preparasyon it KIA kamana man ro pasilidad.
Nagahueat eon lang segun sanda it igapaguwa nga guidelines it health department sa kung paano ro pagbatun it mga international tourists.
Padayun man segun ro pag-maintain it newly renovated passenger terminal building sa KIA, sigidas man ro konstruksyon sa bag-ong ramp kung siin dugang nga 13 slots para sa mabahoe nga aircraft kung matapos eon. / ANN DESLENE SALAZAR