Gipahimangnuan karon sa Davao City Disaster Risk Reduction and Management Office (DCDRRMO) ang mga Dabawenyos ilabi na niadtong nanimuyo sa hazard-prone zone areas, nga mangandam sa posibleng pagbaha ug mga pagdahili sa yuta nga epekto sa nasinating pagdaot sa panahon.
Sumala kang CDRRMO Chief Alfredo Baloran, kinanhanglan igmat ang mga residenteng nagpuyo sa peligrosong mga dapit sanglit molanat pa hangtud sa unang kwarter sa 2022 ang mga pag-ulan tungod sa La Nina season.
Gikabalaka sa opisyal ang mga lugar nga unang gitumbok isip landslide prone area sanglit mas taas ang tsansa nga modahili ang yuta kung sagunson ang ulan.
Sama na lamang matud pa sa nahitabo sa Purok 64, Barangay Talomo Proper kung asa anaa sa tulo ka balay ang nadanyos sa landslide nga nakaapekto sa 20 ka indibidwal nga daan nang gipadad-an og suwat labot sa peligrosong sitwasyon sa yuta nga ilang gipuy-an.
Hinoon mamahimo matud pa nga masubay sa mga residente ang dagan sa panahon sa official Facebook account sa Davao City Disaster Risk Reduction and Management Office ug City Government of Davao Facebook Page.
Sa pagkakaron hapsay ang dagan sa panahon sa Davao Region.BNFM-DAVAO
