LEGAZPI CITY – Liwat na nagbabalik Model OFW Family of the Year (MOFYA) kan Overseas Workers’ Welfare Administration (OWWA).
Ini an kinumpirmar ni OWWA Bicol Overseas Workers’ Welfare Officer 2 Bernard John Bonnet sa Brigada News FM Legazpi.
Segun saiya, liwat nang binuksan an nominasyon kaini, kun sain an kompetisyon igwa nin obhetong tawan nin onra an mga OFW magin an pamilya kaini sa pagigin maray na ehemplo sa kapareho ninda OFW pati sa mga masunod na henerasyon.
Kaibahan sa criteria for nomination kaini an pagigin matrayumpo nin sarong OFW sa saiyang pagtrabaho abroad sa ibong kan manlain-laing mga problema; dapat su boot na maski alawig an distansya igwa man giraray nin ugos na relasyon an saindang pamilya, boot sabihon, warang aki na napariwara o kaya an mga ini napagtapos sa pag-adal.
Apwera kaini, dapat su boot na namanehar ninda an mga finances kun sain igwa nin mga naipundar asin may mga negosyo.
Dapat man su boot na an OFW, igwa nin involvement sa komunidad.
Segun kay Bonnet, pwedesir mag-qualify digdi an mga OFWs na nasa abroad pa o dawa nakauli na sa Pilipinas na dai malampas sa 10 taon.