PAMINAWON ang matag bahin sa himuong public hearing kalabot sa pag-ilis og pangalan sa 17 ka kalye sa GenSan.
Kini ang gibutyag ni Kagawad Elizabeth Bagonoc, chairperson sa Committtee on Tourism, Culture, and the Arts.
Dungan niini giklaro nga dili iyahang proposal apan gikan sa CEMCDO ang pag-ilis og mga pangalan, nga ang uban niini aminado siya nga wala niya usab mauyonan nga ipuli.
Napasang-at sa iyang komiteba ug gitino nga sa miagi pang konseho ang maong sogyot ug karon lang natuki nga siya na naghupot sa maong komiteba sa unang higayon ug angayan lang usab niining paga-aksyunan.
Una nang miani og pagsaway sa social media ang maong proposal tungod makalibog ang ipuli nga pangalan labi na sa mga driver.
Dugang ni Bagonoc mas daghan pang mga locals o pangalan sa nagpuyo sa GenSan ang maoy ipangalan sa mga kalye sama usab sa mga pangalan sa tawo nga may nahatag nga kaayohan sa GenSan.
Nasulod na sa first reading ang maong sogyot ug takda pang magpahigayon og public hearing aron kuhaon ang pulso sa katawhan.
Apan gitino sa konsehal nga tanang requirements sa balaod ang sundon ug desisyon sa katawhan ang masunod.