BICOL—Duwang panibagong water service providers an malaog sa syudad nin Legazpi ngani na maresolbiran an problema sa suplay nin tubig na haloy nang pigpoproblema kan syudad.
Sigun ki Mayor Noel Rosal, saro digdi an Mactan Rock na kayang magsupply nin 5,500 cubic meters nin tubig kada aldaw. Hali suboot sa Cebu an kumpanya asin epektibo ining nagseserbisyo duman.
An saro pa kaini iyu an Kinsai, sarong local supplier asin kayang magtao nin 3000 cubic meters nin tubig kada aldaw.
Apwera digdi, igwa pa suboot nin piglalaoman na dugang na 3000 cubic meters per day na maisusupply kan panibagong pasilidad na ikokonstruhir sa daga na binakal kan LGU sa Barangay Mabinit.
Sa kabilugan, magkakaigwa nin 11,500 cubic meters na dugang sa water supply kan syudad pag gabos ini nareyalisar na target tapuson sagkod sa Disyembre.
Ini suboot an matapar sa kakulangan sa tubig na pigsusuplay kan Philhydro na minaabot sana sa 16,000 cubic meters, kulang na kulang sa 30,000 cubic meters na daily requirement kan syudad.
Sigun pa ki Rosal, an planong ini pasiguro kan syudad huli ta dae suboot sinda nag-aasa sa promesa kan Philhydro na kaya kaining magsupply nin 30,000 cubic meters nin tubig oras na mapakaray an clarifier kan pasilidad kaini.
Igwa kaya suboot nin mga dae piglalaoman na sitwasyon na pwedeser makaapekto sa mga water sources sa Yawa asin Pawa river na pwedeng magpaluya sa water supply. || slm