Naglaom ang labor sector sa Northern Mindanao nga ma-aprubahan sa dili pa matapos ang Hunyo ning tuiga ang giduso nga sugyot ni Senate President Juan Miguel Zubiri nga Senate Bill No. 2002 o Across-the-Board Wage Increase Act of 2023, nga nagtumong patas-an og 150 pesos ang sweldo sa mga empleyado sa nasod.
Sumala kang Associated Labor Union-Trade Union Congress of the Philippines Northern Mindanao Regional Vice President Atty. Proculo Sarmen nga bisan og dili kini igo, dakong tabang na kini aron ma-apas ang poverty threshold sa nasod.
Nanghinaot sab ang maong sektor nga matun-an ang sugyot nga 42,000 pesos nga binulan nga kinitaan sa mga mamumuo, ug ang pagbuhi subli sa sugyot nga himuong regular ang mga job order employees.
Subay niini, gikabalak-an ni Cagayan de Oro Chamber of Commerce President Ray Talimio Jr. nga kung ugaling ma-aprubahan ang maong sugyot posibling musaka ang unemployment rate.
Kini tungod kay mapugos ang mga negosyante nga magkunhod sa ihap sa ilang empleyado aron ma-akomodar ang gipangayo nga increase sa suhulan.
Hangyo sab niini nga kung matuman ang nahisgutang lakang, kinahanglan nga mahatagan sa insentibo ang business sector, sama sa tax credit.
Dugang niini nga dili haom sa tanang rehiyon ang sugyot nga 150 pesos nga omento sa sweldo, tungod managlahi ang cost of living sa mga rehiyon sa Pilipinas.