SORSOGON CITY – Nangunguna ngayon ang lalawigan ng Sorsogon sa may pinakamaraming ISO-Certified na LGUs sa bansa matapos makuha ng LGU Bulusan at Irosin ang kanilang mga seal of approval mula sa standards-setting body para kanilang dekalidad at epektibong serbisyo-publiko.
Ang nasabing dalawang LGU’s ang pang-pito at pang-walong LGU mula sa 15 LGU’s sa lalawigan na nakatanggap na ng sertipikasyon kung kaya ang Sorsogon na ang may pinakamaraming ISO-certified LGUs sa Pilipinas.
Ang LGUs ng Barcelona, Bulan, Castilla, Donsol, Pilar at Sorsogon City ay natanggap na din ang kanilang ISO certification, habang ang iba pang mga munisipalidad ay kasalukuyang sumasailalim pa sa auditing process.
Bukod pa rito, ISO-certified na rin ang lahat ng siyam na ospital sa ilalim ng Sorsogon Provincial Health Office at kinilala “in terms of processes and services” ng Geneva-based ISO.
Matatandaan na noong Hunyo ng nakaraang taon ay nakuha din ng Pamahalaang Lalawigan ng Sorsogon ang ISO 9001:2015 certification nito mula sa Certification International Philippines Inc. at naging unang lalawigan sa Bicol Region at isa sa 81 lalawigan sa buong bansa na naging ISO-certified.
