CEBU CITY – Gikatakdang tukuron ang usa ka health center nga adunay 150 ka bed capacity sa 6,000 square meters nga luna sa Barangay Poblacion, dakbayan sa Naga, sa katapusan sa 2024.
Ang groundbreaking ceremony alang sa maong pasilidad gipahigayon gahapong adlawa sa Naga City Reclamation Area.
Nitambong sa seremonya mao sila si Governor Gwen Garcia ug si Senador Francis Tolentino.
Matud ni Mayor Valdemar Chiong nga muabot sa P350 milyones ang budget alang sa nahisgutang pasilidad.
Nasayran nga ang kinatibuk-ang budget alang sa bag-ong health center gi-aprobahan pinaagi sa loan sa Development Bank of the Philippines.
Samtang ang buhatan ni senador Tolentino mihatag usab ug P50 million nga pundo pinaagi sa Department of Public Works and Highways (DPWH) alang sa unang phase sa konstruksyon sa maong tambalanan.//