MISAKA na sa 157,491 doses sa Covid-19 vaccines ang na-administer sa General Santos City as of September 07, 2021, base sa taho sa LGU. Sa impormasyon sa LGU, nagpadayon ang gihimong vaccination rollout sa tulo ka mega vaccination site ug Rural Health Unit (RHU).
Asa gilaoman nga mosaka pa sa 5,000 katao ang mabakunahan sa GenSan sa matag adlaw ugaling modaghan ang supply sa bakuna. Sa vaccination status, naa sa 18,836 healthcare workers (A1) ang nakadawat sa unang dose samtang 14,623 ang fully vaccinated.
Naa usab sa 13,731 senior citizen (A2) ang nakaangkon sa unang dose samtang naa sa 12.064 ang nakadawat sa ikaduhang dose. Sa adult with comorbidities (A3) sa GenSan naa sa 19,212 ang nakapaturok na sa unang dose samtang 17,173 ang fully vaccinated.
Mokabat usab sa 13,151 ang essential sector workers (A4) ang nakadawat na sa duha ka dose sa bakuna kontra Covid-19. Ang GenSan ang nakadawat og Janssen, Sputnik, AstraZeneca ug Sinovac vaccine nga miresulta sa pagka-fully vaccinated sa 57,011 indibidwal. ( Richel Gubalani)